यस बर्षको ‘सेछ पर्यटन पत्रकारिता पुरस्कार २०७९’बाट पत्रकार हिमाल दाहाल पुरस्कृत भएका छन् ।
सेछ ट्राभलिङ धरानले सुनसरीका पत्रकार दाहाललाई पर्यटन क्षेत्रको विकासका लागि पत्रकारितामार्फत गरेको योगदानको कदर गर्दै १० हजार रुपैयाँसहित पुरस्कृत गरेको हो । पत्रकार दाहाललाई संस्कृति, पर्यटन तथा नागरिक उड्डयन मन्त्री सुधन किराँती र सेछका सञ्चालक वासुदेव बराल र सेछ ट्राभलिङकी प्रोप्राइटर एलिना थापामगरले दोसल्ला तथा प्रमाणपत्र प्रदान गरेका थिए ।
पत्रकार दाहाल सुनसरीलाई कर्मथलो बनाएर लामो समयदेखि पत्रकारिता गर्दै आएका छन् । पुरस्कृत भएपछि दाहालले पर्यटन र पत्रकारिता एक अर्काका अभिन्न अंग भएकाले दुवैलाई जोड्ने गरी पर्यटनको विकासका निम्ती थप रचनात्मक र काम गर्ने ऊर्जा प्रदान गरेको बताएका छन् ।
हरेक वर्ष एकजना पत्रकारलाई ‘सेछ पर्यटन पत्रकारिता पुरस्कार २०७९’ प्रदान गरिदै आएको छ । सेछले पर्यटन क्षेत्रको विकासमा विभिन्न किसिमका रचनात्मक कार्यहरु गरिरहेको छ । पुराना वस्तुहरूको संग्रहालय बनाउने, भारतसम्म पुगेर नेपाली पर्यटकीय स्थलको प्रचार प्रसार गर्ने काम गरिरहेको छ । सेछले सेछ ट्राभलिङ, होटल सेछसमेत सञ्चालन गरिरहेको छ ।
