काठमाडौं । सन् २०३० को विश्वकप फुटबल आयोजना गर्नको लागि स्पेन र पोर्चुगलसँगै सहआयोजकमा अफ्रिकी राष्ट्र मोरक्को थपिएको छ ।
स्पेन र पोर्चुगलले विश्वकप आयोजनाको लागि गत वर्ष नै संयुक्त दाबीको घोषणा गरेको थियो । अब सहआयोजकमा मोरक्को पनि थपिएको छ ।
मोरक्को फुटबलले विश्वकप आयोजकमा स्पेन र पोर्चुगलसँग सामेल भएको जनाएको छ । अब विश्वकप आयोजनाका लागि स्पेन, पोर्चुगल र मोरक्कोले संयुक्त दाबी गर्ने छन् ।
यस अघि स्पेन र पोर्चुगलसँग युक्रेन सहआयोजकको रुपमा रहने बताईएको थियो । तर, रुससँगको युद्दको कारण युक्रेन भूमिका स्पष्ट नरहेको बताईएको छ ।
यस अघि मोरक्कोले २०१० को विश्वकप आयोजनाका लागि दाबी गरेको थियो । तर, दक्षिण अफ्रीकाले आयोजकको रुपमा बाजी मारेको थियो ।
सन् २०३० को विश्वकपका लागि अन्य थुप्रै राष्ट्रले समेत दाबी गरेका छन् । सन् २०३० को विश्वकप आयोजना गर्नको लागि अर्जेन्टिनासहित ४ दक्षिण अमेरिकी राष्ट्रले संयुक्त दाबी पेश गरिसकेको छ ।
विश्वकप आयोजनाका लागि अर्जेन्टिनासँगै चिली, उरुग्वे र पाराग्वेले संयुक्त दाबी पेश गरेको हो । फिफाले यस विश्वकप आयोजनाको घोषणा २०२४ मा गर्ने जनाएको छ ।
