बुद्धिष्ट कम्युनिटी सेन्टर (बीसीसी) यूकेको अध्यक्षमा हर्क बहादुर गुरुङ निर्विरोध निर्वाचित हुनुभएको छ । गत फेब्रुअरि २६ मा लण्डनको अल्डरसटस्थित बीसीसी यूके गुम्बामा सम्पन्न १६ औं साधारणसभा तथा पाँचौ अधिवेशनले गुरुङको अध्यक्षतामा २५ सदस्यीय नयाँ कार्यसमिति चयन गरेको हो ।
यसअघि दुई कार्यकाल उपाध्यक्षको भूमिकामा रहेका गुरुङ प्रोजेक्ट मेनेजरका रुपमा लामो समयदेखि जिम्मेवारीमा हुनुहुन्थ्यो । नेपालीहरुको बाक्लो बसोबास रहेको अल्डरसटमा प्रोपर्टी इन्भेष्टरको रुपमा परिचित गुरुङ विभिन्न संघसंस्था पनि आवद्ध हुनुहुन्छ ।
अत्यन्त सरल स्वभावका गुरुङ भूतपूर्व गोर्खा पनि हुनुहुन्छ । उहाँको दुई छोरा र एक छोरी हुनुहुन्छ । जेठा छोरा अनिज गुरुङ जेठी बुहारी सुमन गुरुङ, कान्छा छोरा अजित गुरुङ कान्छी बुहारी मीता गुरुङ र छोरी स्विटी गुरुङ हुनुहुन्छ ।
उक्त अधिवेशनमा नवनिर्वाचित कार्यसमितिका पदाधिकारी एवं सदस्यहरुलाई बीसीसी यूकेका धर्म गुरुङ टुल्कु जिग्मे सामतेन रिन्पोछेले पद तथा गोपनियताको सपथ गराउनु भएको थियो ।
कार्यक्रममा निवर्तमान चौंथो कार्यसमितिका अध्यक्ष धर्म तामाङले आफ्नो कार्यकाल सफलतापूर्वक सम्पन्न गर्न सहयोग गर्ने सबैप्रति धन्यवाद ज्ञापन गर्दै नयाँ कार्यसमितिलाई बधाई दिनुभएको थियो ।
कार्यक्रममा नवनिर्वाचित अध्यक्ष हर्क गुरुङले आफूलाई पाँचौं कार्यसमितिको जिम्मेवारी प्रदान गरेकोमा धन्यवाद दिँदै सबैको साथ, सहयोग, सल्लाह र सुझावका साथ अगाडि बढ्ने प्रतिवद्धता व्यक्त गर्नुभएको थियो ।
