काठमाडौं । पाहुना टोली वेस्ट इन्डिजले दक्षिण अफ्रिकाविरुद्धको टी-ट्वान्टी अन्तराष्ट्रिय सिरिज जितेको छ ।
जोहन्सवर्गमा मंगलबार राती भएको तेस्रो तथा निर्णायक टी-ट्वान्टी ७ रनले जितेसँगै पाहुना टोलीले सिरिज आफ्नो पक्षमा पारेको हो ।
तीन खेलको टी-ट्वान्टी अन्तराष्ट्रिय सिरिज पाहुना टोलीले २-१ ले जितेको हो ।
वेस्ट इन्डिजले दिएको २ सय २१ रनको लक्ष्य पछ्याएको घरेलु टोलीले २० ओभरमा ६ विकेट गुमाएर २ सय १३ रन मात्र बनायो ।
घरेलु टोलीका लागि ओपनर रिजा हेन्ड्रिक्सले ४४ बलमा ११ चौका तथा २ छक्काको सहयोगमा ८३ रनको अर्धशतकीय ईनिङ खेले ।
रिलि रोउसोले २१ बलमा ४२ रन बनाउँदा कप्तान एडम माक्ररम १८ बलमा ३५ रन बनाउँदै अविजित रहे ।
क्विटन डि कक २१ बलमा २१ तथा डेविड मिलर ११ रनमा आउट भए ।
पाहुना टोलीका लागि अल्जारी जोसेफले ४ ओभरमा ४० रन खर्चिएर ५ विकेट लिए । जेसन होल्डरले १ विकेट आफ्नो नाममा गरे ।
त्यसअघि टस हारेर पहिले ब्याटिङ गरेको भ्रमणकारी टोलीले २० ओभरमा ८ विकेट गुमाएर २ सय २० रन बनाएको थियो ।
पाहुना टोलीका लागि रोमारियो शेफर्डले २२ बलमा २ चौका र ३ छक्काको सहयोगमा अविजित ४४ रन बनाए ।
निकोलस पुरनले १९ बलमा ४१ तथा ओपनर ब्रान्डन किंगले २५ बलमा ३६ रन बनाए ।
राइमन रिफर २७ रनमा रन आउट हुँदा ओपनर कायल मियर्स १७ रनमा आउट भए । जेसन होल्डर १३ तथा कप्तान रोभमन पावेल ११ रनमा आउट भए ।
घरेलु टोलीका लागि एनरिक नोर्किया,लुन्गि एन्गेडि र कागिसो रबाडाले समान २/२ तथा कप्तान एडम माक्ररमले १ विकेट लिए ।
सम्बन्धित समाचार
लोकप्रिय समाचार
