वैदेशिक रोजगारका क्रममा गर्भवती भएर फर्किने अधिकांश महिला नेपाली पुरुषबाटै शोषणमा परेको तथ्यांक सार्वजनिक भएको छ । रोजगारका क्रममा समस्या परेपछि शरण परेका महिलामाथि नेपाली पुरुषहरूले नै शोषण गरेको पाइएको हो ।
बुधबार तरंगिनी फाउण्डेसनले आयोजना गरेको अन्तर्राष्ट्रिय श्रमिकको सम्मानसम्बन्धी सञ्चारकर्मीहरूसँगको अन्तरक्रिया कार्यक्रममा पीडित महिलाहरूले नेपाली पुरुषहरूले नै शारीरिक शोषण गरेको भन्दै न्यायको लागि पहल गरेको सुनाए ।
महिला मानव अधिकार रक्षक सञ्जाल (ओरेक) तथा तरंगिनी महिला अधिकार प्रशिक्षण केन्द्रका अध्यक्ष डा. रेणु अधिकारीले वैदेशिक रोजगारमा गएका महिला अरबीहरुबाट भन्दा धेरै आफ्नै नेपाली दाजुभाइबाट यौन हिंसामा परेको बताइन् ।
उनी भन्छिन्, ‘महिलाको पाठेघर सृष्टिको मुहान हुनुपर्ने तर पीडाको मुहान बन्न पुगेको छ ।’
त्यस्तै उनले गर्भवती भएर फर्किएका महिलाको समाचार लेख्दा सञ्चारमाध्यमले पत्रकारिताको आचारसंहिता पालना नगरेको भन्दै आक्रोश व्यक्त गरेकी छन् । त्यस्तै, उनले वैदेशिक रोजगारमा जाने महिलाको यौनिकतामाथि प्रश्न उठाएर उनीहरूलाई कमजोर नठान्न आग्रह गरिन् । घरेलु कामदारका रुपमा गएका महिला वार्षिक २५ देखि ३० जना गर्भवती भएर नेपाल फर्किन्छन् । नेपाल सरकारले महिलालाई घरेलु कामदारका रुपमा पठाउन स्वीकृति भने दिएको छैन ।
