तनहुँ।अविरल वर्षासँगै जमिन भासिएर सेती नदीमा खस्न लागेको तीन वटा घरका सर्वसाधरणलाई नेपाली सेनाको टोलीले उद्धार गरेको छ ।

तनहुँ जिल्लाको शुक्लागण्डकी नगरपालिका–४ पुल्चोकस्थित सेती नदी किनारामा रहेका घरहरू जमिन भासिएर नदीमा खस्ने जोखिमका कारण स्थानीयको उद्धार गरिएको सेनाको जनसम्पर्क तथा सूचना निर्देशनालयले जनाएको छ ।

पहिरोको जोखिममा रहेका स्थानीयलाई बिहीबार साँझ उद्धार गरिएको सेनाले जनाएको छ । सेनाले स्थानीय निकायहरूसँग मिलेर उद्धार गरेको हो । उद्धार गरिएका सबै जनालाई सुरक्षित स्थानमा राखिएको छ ।

सेनाले पहिरोको जोखिममा रहेका घरहरूबाट स्थानीयको लत्ता कपडा, खाद्यान्‍न तथा भाडालगायत सामान पनि सुरक्षित स्थानमा सारिदिएको छ ।