काठमाडौं । प्रधानमन्त्री पुष्पकमल दाहाल प्रचण्ड र संयुक्त राष्ट्रसंघका महासचिव एन्टोनियो गुटेरेसबीच भेटवार्ता भएको छ । सिंहदरबारस्थित प्रधानमन्त्री कार्यालयमा आइतबार दिउँसो भेटवार्ता भएको हो ।
मुख्यसचिव डा वैकुण्ठ अर्याल र परराष्ट्र सचिव भरतराज पौड्यालले महासचिव गुटेरेसलाई सिंहदरबारस्थित प्रधानमन्त्री तथा मन्त्रिपरिषद्को कार्यालयमा स्वागत गरे ।
नेपालको चार दिने भ्रमणमा आइपुगेका गुटेरेस र प्रधानमन्त्री प्रचण्डबीच शान्ति प्रक्रियाका बाँकी कामबारे कुराकानी भएको प्रधानमन्त्रीको निजी सचिवालयले जानकारी दिएको छ ।
माओवादी जनसेना व्यवस्थापन गर्न संयुक्त राष्ट्रसंघले खेलेको भूमिकाका विषयमा पनि प्रचण्डले महासचिवसमक्ष प्रशंशा गरेका थिए।नेपालको शान्ति, स्थायित्व र आपसी हितका विषयमासमेत कुराकानी भएको प्रधानमन्त्रीको सचिवालयले जानकारी दिएको छ।
यसअघि गुटेरेसले उपप्रधानमन्त्री तथा रक्षामन्त्री पूर्णबहादुर खड्का र परराष्ट्रमन्त्री एनपी साउदलाई सिंहदरबारमै भेटवार्ता गरिसकेका छन् ।
प्रधानमन्त्री प्रचण्डसँगको भेटपछि गुटरेसले संसद भव नयाँ बानेश्वरमा पुर्व प्रधानमन्त्रीहरु शेरबहादुर देउवा र केपी शर्मा ओलीसँग पनि छुट्टा छुट्टै भेटवार्ता गर्दैछन् ।
त्यस्तै,उनी आज ललितपुरस्थित पाटन दरबार क्षेत्र भ्रमणका लागि जानुहुने जनाइएको छ ।
