काठमाडौं।काठमाडौंको सिनामंगलस्थित काठमाडौं मेडिकल कलेज ९केएमसी० का चिकित्सक सहकर्मीमाथि हातपात भएको विरोधमा दोस्रो दिन पनि काम छोडेर प्रदर्शनमा उत्रिएका छन् । उनीहरूले सुरक्षा माग गरेका छन् ।
इन्टर्न चिकित्सकमाथि हातपात भएको भन्दै उनीहरुले काम बन्द गरेर आज दोस्रो दिनन पनि अस्पताल अगाडि सडकमा प्रदर्शन गरिरहेका छन् ।
आन्दोलनमा सहभागि चिकित्सक कमलराज शाहले सहमतिको मसी नसेलाउँदै यस्तो घटना दोहोरिनु कानुनमाथि जनताको विश्वास उठ्नु भएको दाबी गरे ।
उनले भने,‘यो घटनामा संलग्न दोषीलाई सजाय दिनको लागि हामीले आफ्नो आफ्नो स्थानबाट माग गर्नुपर्छ । अस्ति भर्खर सहमति भएको ऐन जुन छ यसलाई पनि अझ प्रचार गर्न आवश्यक भएको देखिएको छ ।’
अर्का चिकित्सक अंकित आचार्यले कसैले पनि कानुन आफ्नो हातमा लिन नमिल्ने भन्दै यसप्रति सबैको ध्यानाकर्षण हुनुपर्ने बताए ।
उनले भने,‘यो घटना दर्ता गर्न मानिरहेको थिएन्,हामी हिजो राति ११ बजेसम्म यहाँ बसेपछि गृहमन्त्रीको फोन आएपछि बल्ल घटना दर्ता गर्नुभयो । यस्तो हुनुभएन । कानुन कसैले पनि आफ्नो हातमा लिन मिल्दैन ।’
चिकित्सक खड्कामाथि हातपात गरेको आरोपमा प्रहरीले रुपक गौतम तथा सरोज गौतमलाई पक्राउ गरेको छ । घटनाको अनुसन्धान भइरहेको प्रहरीले जनाएको छ ।
