काठमाडौं, भारतविरुद्धको अन्तर्राष्ट्रिय मैत्रीपूर्ण फुटबलका लागि नेपाली राष्ट्रिय महिला टिमको बन्द प्रशिक्षण आजदेखि सुरु हुने भएको छ । बन्द प्रशिक्षणका लागि प्रशिक्षण जिम्मेवारी पाएका अनन्तराज थापाले ४३ खेलाडीलाई प्रारम्भिक प्रशिक्षणमा बोलाएका छन् ।
अखिल नेपाल फुटबल संघ (एन्फा)ले थापालाई मैत्रीपूर्ण खेलकै लागि माघ १५ गते नेपाली टिमको जिम्मेवारी सुम्पिएको थियो । एन्फाले नेपाली टिमको सहायक प्रशिक्षकमा गंगा गुरुङ, गोलकिपर प्रशिक्षकमा सुरजकुमार लामा र टिम म्यानेजरमा वृन्दा देवानलाई नियुक्त गरेको थियो ।
